إن الناجح هو ذلك الذى يصرخ منذ ميلاده: جئت إلى العالم لأختلف معه.. لا يكف عن رفع يده فى براءة الأطفال ليحطم بها كل ظلم وكل باطل... د / مصطفى محمود

مدونة تحتوى أفكار مختلفة من شخص مختلف

الأربعاء، 11 ديسمبر، 2013

مراجعتي و تقييمي لجهاز نوكيا Asha501



تمت دعوتي من نوكيا مصر مع عدد آخر من الناشطين على صفحات التواصل الاجتماعي لتجربة جهاز الموبايل Asha501 لمدة 14 يوم و تقييم للجهاز. و دي كانت تجربتي الشخصية :

·        التصميم : الجهاز حجمه صغير بتصميم انسيابي مريح باستخدام خامات حديثة و ألوان زاهية . عجبتني فكرة الغطاء الخلفي اللي بيحتوي الجهاز كله و سهل تغييره و بالتالي سهل تغيير لون الجهاز .

·        الشبكة : الجهاز - كما هو متوقع في الفئة دي - مفيش فيه 3G  .. دا مش حيسبب مشكلة في الاتصال التليفوني لكن الانترنت باستخدام الشبكة (GPRS/EDGE)   بطيء فعلا ...و لكن دا معملش  مشكلة كبيرة لي لأني كنت باستخدم الواي فاي
ملحوظة : جربت التليفون في مناطق الشبكة فيها ضعيفة شوية .... و كان بيستقبل شبكة و باقدر أتصل من غير مشكلة  

·        شريط الأدوات : شريط في أعلى الشاشة بيسهل تشغيل و ايقاف بعض المهام ( انترنت الشبكة - الواي فاي - البلوتوث - التنقل بين الخطين ) سهل علي حاجات كثير حاتكلم عليها بالتفصيل في مكانها

·        الشاشة : الشاشة باعتبرها من المميزات الرئيسية في الجهاز دا : شاشة 3 بوصة "كاباستيف"  مش "ريزيزتيف" - و دا خلى التاتش اسرع و أدق كثير.... فيه مالتي تاتش يعني ممكن اعمل زووم ان و أوت بالتاتش  .. كمان فيه "أكسيليروميتر سنسور" بيحدد وضع الجهاز (رأسي و لا أفقي ) و "بروكسيميتي سنسور " بيقفل الشاشة و أنا باتكلم في الجهاز .... و دي مميزات مش متوفرة في معظم الأجهزة اللي في الفئة دي من السعر ...  لكن طبعا فيه بعض المشاكل الثانية المعتادة في الشاشات اللي في الفئة دي موجودة  زي: في ضوء الشمس كان من الصعب جدا تشوف الشاشة .... و مع الوقت بدأت آثار خربشة تظهر على الشاشة .. و طبعا القراءة من على شاشة بالحجم دا ممكن تكون مزعجة شوية

·         البطارية : فيه سببين رئيسيين بيجبروني أشيل جهاز ثاني معايا بالاضافة لجهازي الأساسي اللي فيه خطي الشخصي : السبب الأول: أي بطارية جهاز أندرويد - زي جهازي الأصلي- مع استخدامي مستحيل تكمل 12 ساعة من غير ما تحتاج شحن ... لكن مع اختبار "عنيف" جدا لجهاز Asha501 : انترنت شبكة و واي فاي - مشغل المزيكا - راديو - كاميرا - فيديو - مكالمات - واتس أب- رسائل - ألعاب - تطبيقات .... البطارية استمرت معايا 24 ساعة تقريبا من غير شحن ... و مع الاستخدام العادي جدا على الأقل البطارية كان ممكن تستمر 48 ساعة من غير الحاجة  للشحن نهائيا

·         الخطين : السبب الثاني اللي بيجبرني أشيل جهاز  ثاني : الثلاث شبكات موبايل في مصر لا يمكن الاعتماد عليهم أبدا .... فغالبا لازم تشيل خط احتياطي من شبكة ثانية ... و دي ظاهرة انتشرت بين كثير من المصريين ... و تفسر زيادة المعروض من أجهزة الخطين في السوق .... لكن طبعا في الفئة دي من الأجهزة -الفئة الاقتصادية- ... فالخطين (ستاند-باي) مش (دوال-أكتيف) ... يعني لما خط يكون شغال (مكالمة أو انترنت) فالخط الثاني بيفصل شبكة ... كمستخدم قديم للتليفونات اللي بخطين ...عجبتني جدا طريقة ادارة استخدام الخطين و سهولة النقل بين الخطوط في شريط الأدوات

·        الواي فاي : كشخص معتاد على انترنت سريع - و مع عدم وجود خاصية3G  في الجهاز فكان الانترنت باستخدام الشبكة (GPRS/EDGE)   بطيء جدا بالنسبة لي .. فكنت باعتمد أكثر على الواي فاي - واي فاي باستخدام راوتر  3G- و كان الأداء ممتاز جدا ..."شريط الأدوات" كان بيسهل جدا تشغيل و ايقاف الخدمة بسرعة.... لكن في كل مرة كنت باضطر أعمل كونكت لتوصيل الجهاز بنفس شبكة الواي فاي بنفسي ...مش كان بيتوصل أوتوماتيك ...
ملحوظة : أعتقد أن أكثر حاجة بتستهلك البطارية في الجهاز دا كانت الواي فاي

·        الأسماء /قوائم الاتصال/ الكونتاكتس : من أكثر المشاكل اللي كانت بتواجهني و بتواجه ناس كثير الحقيقة لما تشتري تليفون جديد : طريقة نقل القوائم القديمة من التليفون القديم للجديد .. الجهاز دا سهل جدا أنك تنقل القوائم بالبلووتوث أو ملفات vcf  غير أنه فيه اختيار إنك تضيف قوائم الأسماء بالصور من الفيسبوك و تويتر ... لكن الحقيقة أنا مقدرتش اضيف غير الأسماء و الصور من الفيسبوك بس .... مش عارف ليه نقل الأسماء من تويتر كان فيه مشكلة بالنسبة لي.... عامة تطبيق تويتر على الجهاز كان من الحاجات اللي ما عجبتنيش خالص و حاتكلم عليه لوحده بعدين..... كمان كان من الغريب إني معرفتش أضيف الأسماء من الجيميل أو الياهو ميل مباشرة بنفس السهولة ... كان لازم أحولهم لملفات  vcf الأول
ملحوظة : طبعا مع تجربة كل الطرق دي لاضافة الأسماء ....بعد وصول القائمة لأكثر من 4 آلاف اسم بدأت أحس ببطء شديد جدا ... و في النهاية اكتفيت بقوائم الأسماء اللي على تليفوني الأصلي + قوائم الفيسبوك بس
 كمان عجبني جدا "مدير القوائم" : الألوان المختلفة المخصصة لكل حرف في القائمة - الأرقام المفضلة - سهولة النقل من و إلى التليفون - سهولة ربط الأسماء المتكرة في قوائم مختلفة في اسم واحد
الحاجة الوحيدة بالنسبة لي اللي أعتقد إنها غابت عن "مدير القوائم " كانت طريقة (البحث الذكي ) - علشان تبحث عن رقم معين لازم تكتب الاسم صح و بترتيب الحروف  - مينفعش تنسى حرف في وسط الاسم أو تكتب جزء من الأسم الأول و جزء من الاسم الأخير مثلا

·        الكاميرا :الكاميرا كانت من المفاجآت في التليفون دا - بالنسبة لكاميرا 3.15 ميجا بيكسل - في تليفون سعره أقل من 700 جنيه .... الأداء كان مبهر جدا بالنسبة لي و افضل كثير جدا من كاميرات بنفس المواصفات لكن في أجهزة ثانية اغلى كثير ... خاصة في ضوء النهار ...غياب الفلاش طبعا بيؤثر على جودة الصور بالليل أو الصور اللي في اضاءة منخفضة بشكل عام .... و طبعا مع "طول بؤري" ثابت للعدسة كانت الصور القريبة "الماكرو" جودتها أقل كثير من صو اللاندسكيب.......لكن في ضوء النهار قدرت ألقط كادرات بالكاميرا دي بجودة كافية للطباعة و من غير استخدام أي برامج لمعالجة الصور .... ملحوظة : أنا خصصت ألبوم لوحده لصور تم التقاطها أثناء الحركة من العربية ..... و كانت النتيجة مذهلة الحقيقة !
دي ألبومات جمعت فيها بعض الصور اللي استخدمت فيها الكاميرا دي :




و دا ألبوم خاص بالتصوير من وضع الحركة :


مع الأسف أداء الفيديو مش بنفس الجودة ...الفيديوهات بجودة كافية لاعادة التشغيل على جهاز موبايل....لكن مش على شاشة كبيرة مثلا .... و دا برضه المتوقع جدا في الفئة دي من الأجهزة

·        الفاست لين (الحارة السريعة) : .فيه صفحتين رئيسييتين في الجهاز : صفحة التطبيقات و صفحة الفاست لين ... الصفحة دي هي "ابتكار" من نوكيا و علامة و ميزة أساسية في الجهاز دا ....."الفاست لين" هي صفحة   بتظهر فيها كل الأنشطة الي تمت على الجهاز ( مكالمات - رسائل - آخر التطبيقات المفتوحة - آخر الملفات المعروضة ) و كمان بتستقبل عليها كل النوتيفيكيشنز/الاشعارات  من برامج السوشيال ميديا و الاتصال زي ( الفيسبوك و تويتر و الواتس اب و فايبر و لاين)  - طبعا المستخدم بيقدر يتحكم في كل المحتويات اللي حتظهر على الصفحة دي-

·        التحكم : الجهاز فيه اربع زراير للتحكم  كانوا كافيين جدا  مع التاتش و "شريط الأدوات" لتقديم جهاز التحكم فيه سهل و سريع جدا .... أنا شخصيا باحب يكون في كل جهاز  زرار مخصوص للكاميرا ..لكن مع الأسف دا مش موجود في الجهاز

·        لوحة المفاتيح : بالاضافة للوحة المفاتيح الانجليزية فيه لوحات للغات ثانية كثير ... طبعا أنا أضفت لوحة المفاتيح العربي .... اللوحتين سهل جدا التنقل بينهم .....مناسبين جدا في الحجم و الترتيب و ممتازين جدا في توقع الكلمات و تصحيح التهجئة ... مفيش حاجة ناقصة في لوحة العربي - الا التشكيل بس


·        الراديو : بيشتغل مع وجود السماعات بس - السماعات بتيجي مع الجهاز - استقبال ممتاز لكل محطات الاف ام المشهورة مع صوت واضح و نقي بشكل جيد جدا

·        مشغل الموسيقى : أداء ممتاز و الصوت عالي و واضح  

·        مدير  الملفات : تطبيق ممتاز  لتصفح الملفات اللي على التليفون أو على كارت الذاكرة و يسمح بنقل و نسخ  و مشاركة المفات بسهولة جدا

·        التطبيقات : نقطة الضعف الرئيسية في التليفون دا و أي تليفون مش أندرويد او أيفون .... طبعا لا توجد اي مقارنة مع تطبيقات الأندرويد و الأيفون ...

عجبني في التطبيقات : الفيسبوك و الواتس أب ... فيهم كل اللي أنا احتاجته للتواصل مع الأصدقاء

الحقيقة إن مجرد وجود برامج زي "واتس أب" و "لاين" على الجهاز دا كان مفاجآة سعيدة بالنسبة لي !
ملحوظة : الواتس أب نزل على الجهاز تلقائيا بعد ما عملت تحديث للنظام

على عكس تطبيق تويتر مثلا اللي أنا حسيت إنه تطبيق "غير كامل" ... طبعا تقدر تعمل الحاجات الأساسية :تتويت و تتابع التايملاين و تبعت رسائل مباشرة و صفحة الانترأكشن تقدر تشوف فيها الردود عليك .... لكن مش حتقدر تشوف مين عمل لك ريتويت أو فيفوريت لتويتاتك مثلا .... كمان مقدرتش أضيف قائمة أسماء تويتر لقائمة أسماء التليفون زي ما اتكلمت عليها بالتفصيل قبل كدا

عجبني متصفح نوكيا اكسبرس : سريع و فيه كل الأدوات اللي أنا محتاجها لتصفح الانترنت بسهولة و سرعة مع امكانية فتح أكثر من صفحة في نفس الوقت

عجبني جدا تطبيق البريد الالكتروني اللي في التطبيقات الأساسية للجهاز ... عجبتني جدا فكرة إني أقدر أتصفح بريدي على الجيميل و الياهو من مكان واحد ... مع الأسف طبعا الايميلات الي فيها صور كبيرة كانت مش بتظهر.

عجبني تطبيق الطقس : بيقدر يحدد المدينة اللي أنا فيها ..و بيعرض بيانات الجو بدقة

حاولت ألاقي تطبيق كويس لفليكر أو انستجرام مع الأسف مفيش غير تطبيق واحد بيقدر يستعرض الصور على فليكر بس لكن مش بيقدر يعمل أبلود للصور من التليفون لموقع فليكر ... و تطبيق واحد بيقدر يستعرض الصور على انستجرام و باستخدام متصفح نوكيا اكسبرس مش تطبيق مستقل

معرفتش الاقي تطبيق مجاني يفتح ملفات الوورد أو الاكسل أو البي دي اف اللي أنا نسختها على كارت الميموري للجهاز

الألعاب طبعا سواء الألعاب الأساسية على التيلفون أو اللي أنا عملت لها داونلود كانت ألعاب ضعيفة جدا و مش مسلية بالنسبة لي

فيه تطبيق خرائط من نوكيا "HERE"   لكنه مع الأسف مش بينزل في الأجهزة اللي بتنزل السوق المصري

الحكم النهائي :
 من المعروف إن كل شركات الموبايلات بتنتج عدد لا نهائي من الأجهزة لتوفير جهاز لكل فئة من العملاء... و بالتالي لو أنا في الفئة اللي عايزة جهاز اقتصادي بخطين و يهمها كفاءة الشاشة و سرعة التاتش و مهتمة بالتصوير و بتحب تسمع مزيكا أو أي ملفات صوتية ثانية و في نفس الوقت يهمها وجود تطبيقات لاستخدام مواقع السوشيال ميديا و الاتصالات و البريد الالكتروني الرئيسية لكن مش مهم عندها توفر انترنت سريع طول الوقت و لا ألعاب و تطبيقات قوية بالتأكيد حافكر جديا في الجهاز دا.



Nokia Asha 501 

الصورة من موقع :
http://www.gsmarena.com

هناك تعليقان (2):

  1. شكرا جزيلا على الشرح الوافي و الضافي بس ما فهمت كيف انزل لوحة مفاتيح العربية

    الف الف الف شكر

    ردحذف
    الردود
    1. شكرا الأخ الفاضل
      ستقوم بالدخول من القائمة الرئيسية على Settings
      ثم تختار : writing settings
      ثم : Add keyboards

      ثم تختار لوحة المفاتيح العربية

      حذف